早排有個北京客主動打嚟，想我哋幫手請人，因為佢只係startup公司，香港Office規模預算得6個人左右，人生路不熟，搵獵頭做招聘好合理，但弊在佢心頭好高，點名要撬幾間大集團嘅人，不如我咁樣比喻啦，個客喺旺角開咗間開心賓館，而佢就想請文華東方同埋半島嘅職員。
「陳總，魚果屍姐Young，禾趴痕蘭。」
「你講廣東話吧，我聽得懂。」(佢都係繼續講國語)
「哦，好，因為喺幾百人嘅大集團返工，突然轉去細公司，喺佢哋嘅角度係倒退，而且都未必適應，咁樣搵人應該唔容易，會唔會考慮其他有相關行業經驗嘅人?」
「怎麼會? 我可以支付相同工資，我有錢呀，而且公司不出幾年都會擴充，將來不止幾百人呀！我有的是資金，一定請到這些人。」
我好快已經意識到，同陳總解釋都係嘥氣，因為我記得2002年發生過嘅一件事，當時葡萄牙同埋中國隊喺澳門踢熱身賽，為2002年嘅世界盃備戰，因工作關係出席咗飯局，席間有位記者訪問郝海東(當年中國隊前鋒)。
(編按:2002年世界盃決賽周分組賽，中國被編排入C組，同組對手有巴西、土耳其同埋哥斯達黎加，成為小組頭兩名將會出線16強)
記者:「你認為中國隊出線16強的機會如何?」
郝海東聽完真心嬲，瞪大隻眼回應:「你幹嘛問我們晉身16強的機會?為甚麼不問我們晉身8強及4強的機會?」
記者:「喔...」睇得出佢係嚇呆咗，應該疑惑緊係咪聽錯，唔通自己啲國語咁差?
郝海東:「中國和土耳其實力差不多，我們絕對可以擊敗哥斯達黎加，最多僅負巴西，中國隊有力走得更遠。」
OK，唔該晒，你咁惡，點敢駁你吖。
結果呢? 當年中國隊喺分組賽3戰全敗失咗9球而出局，介紹返，係踢3場都入唔到一球，即係俗語所講嘅3零部隊，0勝0入球0分。
郝海東令我見識到咩叫大蛇屙尿，做人冇夢想同條鹹魚有咩分別先? 從此之後我遇到啲心頭好高嘅客，我都會諗起當年個記者訪問郝海東嘅情景，嚇我唔到既，無論係開心賓館想請文華東方員工，抑或係New Barlun想請Nike個設計師，一律冇問題，等下吖陳總，搵到適合嘅求職者Call你，等我呀。
Search